Ինչպես հայտնի է, Ռ. Քոչարյանը միառժամանակ տուն է վերադարձել: Եթե նախկինում տուն վերադառնալու նրա բոլոր միջնորդությունները դատարանը մերժում էր, անգամ այն, որը նախկին մի քանի վարչապետեր էին ներկայացրել, ապա նրա վիրահատությունից հետո միջնորդությունը բավարարվեց:
Բավարարելով միջնորդությունը՝ դատարանը շուրջ երկու միլիարդ դրամի գրավագումար էր պահանջել՝ տալով երկու օր ժամանակահատված:
Արդեն առավոտյան հայտնի դարձավ, որ գումարը վճարվել է ռուսաստանաբնակ ձեռնարկատերերի կողմից, իսկ Քոչարյանը տուն է վերադարձել: Այդպիսով՝ նա տնից պետք է շարունակի իր հետվիրահատական վերականգնողական շրջանը, ինչպես նաև դատավարության հետագա ընթացքը:
Քիչ առաջ նրա սոցցանցային էջում հրապարակվեց նոր լուսանկար: Լուսանկարը վերնագրված է «Տանը»: Այս հրապարակման տակ տեղ են գտել տարատեսակ մեկնաբանություններ՝ հանդիմանություններից, մեղադրական խոսքերից մինչև ուրախության, ոգևորության դրսևորումներ ու բարեմաղթանքներ:
Եղել են նաև հումորային մեկնաբանություններ, որոնց մեջ հատկանշական են «թիթիզ ջինսի» ու նրա ոճի մասին գնահատողական գրառումները:
