Երվանդ Ենգիբարյանը մեր ժամանակների ամենից տաղանդավոր արտիստներից է, ով, ցավոք սրտի, դժբախտ պատահարի արդյունքում շատ շուտ՝ ուժերի ծաղկման շրջանում հեռացավ կյանքից՝ անավարտ ու անկատար թողնելով իր մի շարք ծրագրերը ապագայի հետ կապված։
Երվանդը ծնվել ու մեծացել է արտիստական ընտանիքում։ Նրա հայրը՝ Ժակ Ենգիբարյանը, նույնպես ժամանակին հարգված ու տաղանդավոր արտիստ է եղել։ Նա ծնունդով գյումրեցի էր, կյանքից հեռացել է 2021 թվականի հունվարին։
Երվանդի հայրը մանուկ հասակում տեղափոխվել է Երևան, որտեղ էլ ապրել ու շարունակել է իր հետագա կյանքը։
Երվանդը կրթությունը Երևանում է ստացել՝ 2006 թվականից սկսելով աշխատել տարբեր թատրոններում որպես դերասան։
Հընթացս հաջողությամբ հանդես է եկել ֆիլմերում՝ իր կերտած կերպարների շնորհիվ հայտնիություն ու սեր վաստակելով։
Երվանդն այսօր կդառնար երեսունութ տարեկան, մինչդեռ արդեն ութ տարի է, ինչ նա ֆիզիկապես մեզ հետ չէ։
Երվանդին ընկերները մեծ ու անանց կարոտով և ափսոսանքով են հիշում։
