Հավասարության մասին տարատեսակ պատկերացումներ ու խոսակցություններ եղել են, կան ու կլինեն։ Հավասարությունն այն միավորող գիծն է, որն օգնում է հաղթահարել հասարակությունների դասակարգային բևեռումները։
Դասակարգային շերտավորվածության ու անհավասարության մասին խոսակցությունները ավելի թեժացան հատկապես Գ․ Ծառուկյանի կազմակերպած գերշքեղ հարսանեկան արարողության առիթով։ Գեղարքունիքցի Արմինե Մելքոնյանը հասարակության հավասարության ակնառու օրինակ է բերում մարզի Վարդենիկ համայնքի օրինակով։
Պարզվում է՝ այնտեղ կա հատուկ, անխախտ ճաշացանկ, որը մատուցվում է թաղման արարողությունից հետո։ Ա․ Մելքոնյանը գրում է հետևյալը․ «Իսկ դուք գիտեի՞ք․ Գեղարքունիքի մարզի Վարդենիկ համայնքում թաղման հացը տալիս են բոլոր ընտանիքներում նույն ճաշացանկով։
Ձիթապտուղ, կանաչի, խաշլամա, օղի, հանքային ջուր, թթու, հաց, պանիր։ Եթե այս ցանկից ավել բան է դրված լինում սեղանին գյուղացիները սեղանին չեն մոտենում ու դուրս են գալիս։ Սա է հավասարության լավագույն օրինակը»,- հասարակության հավասարության մասին իր միտքն ավարտում է Ա․ Մելքոնյանը։
