Շատերին մեծապես հուզել և անհանգստացրել է վերջերս երկու նորածին բալիկների ճակատագիրը, որոնց լքել են մայրերը՝ ծնունդից ժամեր անց, մեկին՝ Գյումրիում, մյուսին՝ Երևանում։
Այսօր Երևանում լքված փոքրիկին այցելել է Արմեն Մուրադյանը Աշխատանքի և սոցիալական հարցերի նախարարի պարտականությունները կատարող Նարեկ Մկրտչյանի հետ միասին։
Գտնվելուց հետո բալիկը գտնվում է Մուրացան հիվանդանոցային համալիրում։ Սկզբնական շրջանում անխնամ մնալու և շատ լացելու պատճառով բալիկը բավականին վատ վիճակում է եղել։
Բժիշկների հոգատար խնամքի շնորհիվ բալիկի վիճակը կայունացել է։ Ի ծնե ոչ մի արատ չունեցող փոքրիկ կարողացել է հաղթահարել հետծննդյան դժվարին պայմանների վատ ազդեցությունը և հիմա իրեն լավ է զգում։
Երեխան շարունակելու է մնալ պետության հոգածության ներքո դեռ երեք ամիս։ Այս ընթացքում պետությունը սպասելու է բալիկի ծնողների հայտնվելուն։ Այդ ընթացքում պետությունը պարտավոր է հոգալ երեխայի խնամքի հարցերը՝ բալիկին շրջապատելով հոգատարությամբ ու ջերմությամբ։
