Երևանի քաղաքային իշխանությունները ցանկանում են նպաստել շենքերի պատշգամբների կանաչապատման մշակույթի զարգացմանը և նույնիսկ նախատեսում են այդ թեմայով մրցույթ անցկացնել։
Երեւանում շենքերի պատշգամբներն ու տանիքները շուտով կանաչապատվելու են, իսկ տների պատերը «գրավելու են» գանգուր բույսերը։ Այս մասին հայտնել է Երևանի քաղաքապետարանի բնապահպանության վարչության աշխատակից Գայանե Ներսիսյանը։
Շաբաթ օրը Խաչքարերի պուրակում (Գարեգին Նժդեհի արձանի մոտ) բացվել է ցուցահանդես-տոնավաճառ ՝ կանաչապատումով զբաղվող ընկերությունների մասնակցությամբ։ Այն բաց կլինի նաև սեպտեմբերի 29-ին:
Միջոցառման նպատակն այն է, որպեսզի մարդիկ, այցելելով տոնավաճառ, ծանոթանան ծաղիկների տեսականուն, խորհրդակցեն մասնագիտական կառույցների ներկայացուցիչների հետ, թե ինչպես պետք է խնամել ծաղիկները, պատշգամբները ինչ գույներով կարելի է զարդարել», — պարզաբանեց քաղաքապետարանի աշխատակցուհին։
Ներսիսյանի խոսքով ՝ իրենք ուզում են, որ Երևանում զարգանա պատշգամբների կանաչապատման մշակույթը։
Նրա խոսքով ՝ քաղաքապետարանը շուտով կսկսի շենքերի կանաչապատման աշխատանքները ՝ գանգուր բույսերի օգնությամբ։
«Երևանում կան վայրեր, որտեղ գրունտային հողատարածքը զբաղված է, իսկ կենտրոնը ՝ խիտ կառուցապատված, ուստի մենք պետք է կիրառենք կանաչապատման այլընտրանքային մեթոդներ։ Քանի որ մեր քաղաքն աղտոտված է տրանսպորտային միջոցների արտանետումներով, մենք պետք է ամեն կերպ կանաչացնենք Երևանը», — համոզված է նա։
Նշենք, որ Երևանի քաղաքապետարանը նախատեսում է նաև անցկացնել «տարվա լավագույն կանաչապատ պատշգամբ» համաքաղաքային մրցույթը։
Երևանի շենքերի պատշգամբներն ու տանիքները կզարդարեն ծաղիկներով՝ քաղաքապետարանը կանաչապատելու է քաղաքի շենքերը
