Գյումրու փողոցներից մեկում գտնված փոքրիկ տղան մի քանի օրվա ընթացքում կարողացել է բժիշկների հոգատարության ու խնամքի շնորհիվ վերականգնել իր առողջական վիճակը և լիարժեք ապաքինված դուրս գրվել հիվանդանոցից։
Բալիկի խնամակալությունը ստանձնելու խնդրանքով Գյումրու համապատասխան պատկան մարմիններին են դիմել երկու ընտանիքներ։ Համապատասխան հարցումների և հետազոտական աշխատանքների արդյունքում որոշում է կայացվել երեխային հանձնել խնամակալության համար դիմած ընտանիքներից մեկին։
Բալիկի անվան, ծննդյան վկայականի, բնակության խնդիրը և այլ հարցեր կարգավորելու լիազորություններ ունի Գյումրու հոգաբարձուների խորհուրդը՝ մինչ երեխայի կենսաբանական ծնողների ի հայտ գալը։
Հայտնի է, որ բալիկին Արեն են անվանել։ Ընտանիքը, որին հանձնվել է փոքրիկ Արենի խնամքը, ըստ Գյումրու քաղաքապետարանի հոգաբարձության և խնամակալության մարմնի ներկայացուցիչ Էվդարդ Բաղրամյանի՝ բավականին ապահովված է և կարող է զբաղվել բալիկի խնամքով լիարժեք կերպով։
Ամեն դեպքում՝ քաղաքապետարանը սպասում է փոքրիկ Արենի կենսաբանական ծնողների հայտնվելուն։
