Մրջնաբույն բառը լսելիս բոլորս անմիջապես պատկերացնում ենք համեղ թխվածքը, սակայն այս անգամ Մրջնաբույնը քաղցրեղեն չէ, այլ ոչ պակաս համեղ աղցան։ Այն դժվար չէ պատրաստելը և կկարողանաք գլուխ բերել ու զարդարել ձեր սեղանը՝ հաճելորեն զարմացնելով հյուրերին։
Անհրաժեշտ է՝
Հավի կրծքամիս — 200 գ
Վարունգ -2 հ․
Լոլիկ — 2 հ․
Կարտոֆիլ — 2 հ․
Պինդ տեսակի պանիր — 100 գ
Սխտոր — 1 ատամիկ
Աղ, սև պղպեղ
Կանաչ սոխի մի քանի ճյուղ
Մայոնեզ՝ ըստ ճաշակի
Անսովոր, հետաքրքիր և անչափ անեղ այս աղցանը պատրաստելու համար կեղևահանած և քերիչի մեծ անցքերով անցկացած կարտոֆիլը ողողել սառը ջրում սրբիչի վրա ցամաքեցնել և տապակել բուսայուղում, որից հետո խոհանոցային անձեռոցիկի վրա դնել և հեռացնել ավելորդ յուղը։
Վարունգը, լոլիկը, խաշած կամ տապակած կրծքամիսը կտրատել մանրացված ձողիկների տեսքով, պանիրը անցկացնել քերիչով և սկսել հավաքել աղցանը։
Մատուցվող լայն և տափակ ափսեում որպես առաջին շերտ դասավորել կրծքամիսը, այնուհետև պատել մայոնեզով, որից հետո վարունգ, մայոնեզ, լոլիկ, մայոնեզ, պանիր, մայոնեզ հերթականությամբ և վրան բուրգի տեսքով լցնել տապակած կարտոֆիլը՝ շաղախված մանրացված սոխով և սխտորով, աղով և սև պղպեղով։ Անուշ լինի։
